【職場生存必備系列— CV 點寫先唔會扣分？】#MrBusiness #cv
公司最近請人，呢個幾星期 HR 同事間唔中會 CC 埋應徵者 CV 比我，每次小弟都覺得 CV 同副「照妖鏡」無分別，未見其人，先見其字，字裡行間應徵者性格都反映到一二。想從 CV 突圍而出，第一件事就是去除可能的扣分位。
1）Cover Letter 唔好搬字過紙
Cover Letter 係 First Impression， HR 好多時真係會睇。仲有，唔好當 HR 係傻嘅，一睇就分辨得到份 Cover Letter 係咪網上抄返黎，所以千祈唔好搬字過紙。就算係參考都要跟番自己真實資料寫，小弟真係見過明明應徵 design，但就寫自己的對銷售工作有熱誠，粗心大意到咁點請？
2）唔關事既兼職／短工經驗可skip
現在大多人都鍾意炒散，工作經驗寫得愈多並不代表聘請機會愈大，見工者會留意工作經驗對其公司有咩得著才考慮，而且工作年期亦能反映個人穩定性。而且 HR 你份份工都做咁短，又點敢請你返黎？
3) 忌寫得太冗長
寫 CV最緊要簡而精，就算你有十行全能，都唔需要盡錄，如果見工者對你有興趣自然會約見面試，到時再加以詳述都未遲。小弟見過超過10張紙的 CV，好似寫自傳咁。講真，10張紙可以睇到10份 CV 喇。
4）Email 地址切勿太細路
每當見到如 iloveubb1213＠xxx.com、[email protected] 等以上類型的電郵地址求職，就有唔專業嘅感覺，即使個Email 用左好耐有感情，但最好都另開一個正常命名的帳戶，等人唔好覺得請緊個小朋友返工。
5）Double Check 錯別字 ＆ Tune 字體
打完份 CV 記得搵幾個朋友幫你 double check 下，睇睇有無錯字，錯字係 CV 大忌，會令人覺得你做事粗心大意，更懷疑你嘅學歷水平。另外亦要 fine tune 番字體，避免使用多於兩款字體，字型時大時細亦會睇到對方好混亂，有需要時更可適量運用粗體或斜體去標示關鍵字眼。
其實份 CV 正正常常，去除可能的扣分位，當有機會 interview 個陣，sell 下自己長處，表現誠懇啲，咁就算宜家市況麻麻，都唔洗擔心無人請！
Search